Partisipashon di trahadó na Kòrsou

Ta un luho òf un nesesidat?

Djaweps 5 di desèmber próksimo, CAOP (Hulanda) riba enkargo di CGOA (Kòrsou), lo tene un seshon interaktivo di partisipashon di trahadó. Di parti di CAOP lo tei komo orado señor Marco Sikkel i señor Alphons de Lange. Tur dos ta personanan ku durante vários aña ta intensivamente enbolbí ku e desaroyo di e partisipashon di trahadó tantu na Kòrsou komo na e otro islanan den Karibe Ulandes.

E meta di e seshon interaktivo ta pa duna partidonan den CGOA i tambe otro interesadonan tantu paden komo pafó di e sektor públiko ideanan nobo den e desaroyonan riba e tereno di partisipashon di trahadó, kontrol i partisipashon riba tereno di trabou.
Den e seshon aki lo tin oportunidat pa diskutí ku otro riba kua forma òf kombinashon di formanan di partisipashon di trahadó, por ta esun mas efisiente den e konteksto spesífiko sosial-kultural di Kòrsou.

E seshon interaktivo lo tuma lugá den e sala Wayaca na World Trade Center (WTC) i lo kuminsá mitar di sinku di atardi i lo dura dos ora.