Presentashon na Centraal Georganiseerd Overleg in Ambtenarenzaken (CGOA) riba struktura di Organisashon di Impuesto Nobo (NBO)

WILLEMSTAD, 24 di sèptèmber 2020 – Durante e enkuentro di CGOA ku a tuma lugá awe mèrdia den sala di reunion grandi den edifisio di PWFC, Minister di Finansa sr. Kenneth Gijsbertha, kompañá pa su tim di konseheronan, a duna un presentashon riba e plan pa riba término korto lanta un organisashon di impuesto nobo (Nieuwe Belastingorganisatie, NBO).

E NBO lo konsistí di ofisina di Ontvanger, Inspekshon di Impuesto i Stichting Belasting Accountantsbureau (SBAB) basá riba e nesesidat pa yega na un organisashon di impuesto integrá, mas moderno, efektivo i efisiente ku ta kumpli ku norma i eksigensianan moderno.

Durante e presentashon, e tim di Finansa a bai den liñanan grandi riba e struktura ku e ta vislumbrá pa ku e NBO ku básikamente ta basá riba plannan ku tabata eksistí kaba i a enfatisá e importansia di e restrukturashon aki pa por garantisá un mihó ‘compliance’ di parti di pagadónan di impuesto i entradanan struktural pa gobièrnu.

E NBO lo tin ku drenta na vigor dia 1 di yanüari 2021. Komo ku ta trata di un proseso di reorganisashon di servisionan di gobièrnu, esaki lo tin konsekuensianan pa ku posishon hurídiko di esnan ku aktualmente ta laborá na ofisina di Ontvanger, Inspekshon di Impuesto i SBAB. Ta den e kuadro ei a opta pa informá CGOA riba e plannan.

Despues di e presentashon a kumbiní ku lo instituí mas pronto ku ta posibel un grupo di trabou ku lo konsistí di representantenan di Ministerio di Finansa, HRO i di e organisashonnan sindikal representá den CGOA.

Riba e foto: un bista riba e enkuentro