WILLEMSTAD, 3 di mei 2021 – Entrante 1 di mei último señor Ronaldo Abrahams di e organisashon representativo Nederlands-Antilliaans Politiebond (NAPB) a asumí pa un periodo di 1 aña presidensia di Komishon Sentral di Sindikatonan (Centrale Commissie van Vakbonden, CCvV) di akuerdo ku artíkulo 1, insiso 2, di e reglamento di órden di CCvV.

Artíkulo 1, insiso 2, di e reglamentu aki ta stipulá ku presidensia di CCvV ta pa un periodo di un aña i ta sirkulá bou di e organisashonnan representativo. Señor Amado Vilchez di Sindikato Ambtenarnan di Polis i Kadena Hudisial (SAP) a asumí e kargo di visepresidente.

Te ku 30 di aprel último presidensia di e komishon tabata den man di señores Mario (‘Totty’) Chirinos q.e.p.d. di Sindikato Trahadornan di Aduana i Fiskalia (STrAF) i George Hernandez di Algemene Bond voor Overheidspersoneel (ABVO).

Durante traspaso di tareanan ku a tuma lugá den un enkuentro virtual dia 29 di aprel último, a agradesé e presidente i visepresidente saliente di CCvV pa nan kontribushon balioso na interes di trahadornan den sektor públiko den e plataforma di CCvV i CGOA.