Ta start ku konsulta sektoral di Hustisia i Enseñansa

WILLEMSTAD, 26 di yanüari 2022 – Den luna di febrüari próksimo lo inisiá ku konsulta sektoral den kuadro di CGOA ku e sektornan di Hustisia i Enseñansa. Riba base bilateral e organisashon representativo den CGOA, ku ta sali na interes di e personal ku ta laborá spesífikamente den e dos sektornan aki, lo bai atendé direktamente, di un forma institushonalisá, ku e titularnan di Hustisia i di Enseñansa riba tópikonan ku ta regardá posishon hurídiko di e personal ku ta kai bou di nan responsabilidat ministerial. E konsulta sektoral di Hustisia lo ta entre e organisashonnan ABVO, NAPB, STrAF i SAP i Minister di Hustisia señor Gilmar Pisas. Esun di Enseñansa lo ta entre ABVO, Sitek i Minister di Enseñansa, Siensia, Deporte i Kultura señor Cithree van Heydoorn. E konsultanan sektoral lo ser dirigí pa presidente di CGOA. E konsulta general riba asuntunan relashoná ku posishon hurídiko di funshonarionan públiko den sektornan spesífiko tin su base legal den artíkulo 20 di e ordenansa CGOA (P.B. 2008, no. 70) i den e dekreto gubernamental konsulta sektoral manera publiká den P.B. 2019, no. 81.