SER ta presentá Informe Anual 2021

WILLEMSTAD, 14 di desèmber 2022 – ,,Fomentá konfiansa, kooperashon i resilensia”. Esei ta e título di e informe anual 2021 di Konseho Sosial Ekonómiko (SER) ku a ser presentá awe na Gobièrnu. Promé Minister sr. Gilmar Pisas a risibí e promé ehemplar di e relato for di mannan di presidente den funshon di SER, sr. mr. John Jacobs i direktor/sekretario general sr. drs. Raúl Henríquez.

E informe anual ta duna un rekuento di aña 2021, ku sigun e órgano konsultivo, “tabata un aña ku den vários sentido tabata unu difísil i partikularmente vulnerabel, spesialmente mirá for di perspektiva sosioekonómiko.” Sigun SER, despues di e aña duru di e vírus di Corona (2020), e di dos semèster di 2021, a kuminsá demostrá señalnan alentador (por ehèmpel, un kresementu espektakular di turismo di estadia i un kresementu den sektor di informashon i komunikashon i tambe di proyektonan di konstrukshon) ku tabata indiká un rekuperashon aselerá, aunke, di un forma generalisá, e poblashon aktivo i produktividat laboral a sigui disminuí durante e periodo aki ku un oumento di emigrashon.

,,Ta premirá ku e tendensia aki lo kontinuá debí na último desaroyonan mundial. E probabilidat ta real ku empleo lo no yega na nivelnan pre-pandémiko te ku aña 2023. Tambe ta premirá ku ekonomia lo no rekuperá na nivelnan di promé ku e krísis di COVID-19. Por lo tantu, ku e tasa di empleo aktual, pais lo generá ménos. Ku otro palabra, un empobresimentu na nivel nashonal. For di e punto di bista aki, ta komprendibel ku e presunto falta di toma di desishon desisivo di parti di gobièrnu i ehekushon di maneho firme ta kondusí na frustrashon i desapunto bou di gruponan den nos komunidat. Kosnan ku ántes tabata lógiko i evidente, no ta lógiko i evidente mas. Esei ta loke e krísis di COVID-19 a siña nos. E lès duru aki ta eksigí un reflekshon krítiko riba maneho i práktika gubernamental, práktika di interlokutornan sosial i tambe di siudadanonan.”

E prólogo di e informe anual ta suprayá ku Kòrsou ta un pais bunita ku un potensial grandi. ,,Ta nos deber di saka mas probecho ku ta posibel di e potensial aki. Esaki ta nos deber i kompromiso na futuro generashonnan. E palabranan klave den e kuadro aki ta “konfiansa i “kooperashon”. No un konfiansa ingenuo i siegu, sino un konfiansa sano i madurá, den kua nos ta rekonosé nos vulnerabilidatnan ku ta inherente na e echo ku Kòrsou ta un estado insular chikí den desaroyo i ku denter di e kuadro aki ta buskando solushonnan viabel i efikas pa problema i retonan, ku nos ta kontra na kaminda debí na nos ekonomia habrí i nos posishon relativamente vulnerabel komo mikro estado den un mundu kompleho ku ta evolushonando rápidamente. Tambe mester afirmá ku nos karakter insular, kultura i mentalidat komo pais Karibense ta trese sierto retonan spesífiko kuné. Konfiansa den otronan; konfiansa den e noshon ku kooperashon ta base pa kresementu i desaroyo; konfiansa den e poder di inisiativa i di ingeniosidat di abitantenan di e pais aki i di otronan, tantu paden i pafó di Reino Hulandes, ku ta preokupá nan mes ku Kòrsou i ta wak e komo un pais kaminda nan ke establesé nan mes; konfiansa den maneho gubernamental, a lo ménos den e bon intenshonnan tras di e maneho aki, aunke nan ta basá riba imperfekshonnan institushonal (manera e.o. falta di kooperashon i defisiensianan den organisashon atministrativo); konfiansa den prosesonan ku ta outo regulá nan mes, sin ku intervenshon gubernamental outomátikamente ta nesesario; konfiansa den un futuro stabil i sigur pa generashonnan benidero. Mester komprondé si ku konfiansa no ta desaroyá su mes di anochi pa di dia. Mester invertí hopi tempu i energia den esaki ya ku e tin komo base resultadonan palpabel.”

Komo órgano konsultivo permanente di gobièrnu i di parlamento riba materia sosioekonómiko, SER lo kontribuí na sigui fomentá e konfiansa ei dor di sigui emití reflekshonnan i análisisnan krítiko den un konteksto tripartit (empresarionan, trahadónan i ekspertonan independiente), formulando rekomendashonnan konkreto i fomentá pensamentunan i debatenan den komunidat ku tin nan impakto riba maneho gubernamental i legislashon.

Por lesa e informe anual 2021 aki.