Willemstad, 18 di òktober 2024 – Partidonan den e Sentral Organisá di Diálogo pa Asuntunan Hurídiko di Empleadonan Públiko (Centraal Georganiseerd Overleg in Ambtenarenzaken, CGOA) a tuma un paso importante ayera, 17 di òktober 2024, dor di firma un konvenio ku ta finalisá e rebaho di 12.5% den kondishonnan laboral di ámtenarnan i maestronan di skol ku tabata na vigor for di aña 2020.
Ku firmamentu di e konvenio, partidonan a haña otro riba e forma kon pa eliminá artíkulo 9 di e Ordenansa Landsverordening inkorting arbeidsvoorwaarden 2020 (P.B. 2020, no. 158). Esaki ta habri kaminda pa restourá i restituí diferente benefisio finansiero ku funshonarionan públiko i empleadonan den kondishonnan ekivalente manera maestronan di skol, tabata gosa di dje promé ku e pandemia di COVID-19. Awor ku a firma e konvenio e proseso leglislativo por kontinuá pa por hasi posibel ku ámtenarnan i esnan den kondishonnan ekivalente, por risibí nan trede, 3% lumpsum i indeksashon ku forsa retroaktivo te ku 1 di yanüari 2024.
Despues di e akto di firmamentu, partidonan a ekspresá nan gratitut i rekonosementu pa e forma kon a hiba e diálogo i negosashonnan pa yega na un solushon satisfaktorio ku ta benifisiá e empleado públiko í gobièrnu komo dunadó di trabou.
Ku eliminashon di e 12.5% ta yega un fin na un periodo di ousteridat pa e amtenar i esnan ekivalente ku a eksperensiá último añanan un deterioro den nan kondishonnan laboral komo konsekuensia di e pandemia di COVID-19.
Partidonan a suprayá ku restitushon di e benefisionan atkerí no solamente ta un alivio finansiero sino tambe ta kontribuí na restablesé konfiansa den gobièrnu den su kalidat komo dunadó di trabou. E speransa ta ku e konvenio aki lo sirbi komo un estímulo importante pa mas desaroyo i reforma positivo den kuadro di funshonamentu di aparato públiko di Kòrsou.
