Willemstad, 20 yanüari 2026
Durante e rueda di prensa di e Komishon Sentral di Sindikatonan (CCvV) ku wordu tene ayera, 19 yanüari 2026, e presidente di CCvV, señor Juan Lourens, ta mira bèk riba un aña eksitoso den kua a logra resultadonan importante pa e empleado públiko.
CCvV ta konsistí di sinku sindikato representativo (ABVO, SITEK, NAPB, SAP i STrAF) i nan ta tene diálogo bilateral ku e Minister di Gobernashon, Planifikashon i Servisio (BPD) komo representante di Gobièrnu enkuanto asuntunan ku ta regardá posishon hurídiko dje empleado públiko.
Segun presidente Lourens, CCvV a logra avansenan konkreto durante e último aña. Por ehèmpel: riba proposishon di CCvV, e porsentahe di e prima di vakashon a subi di 6% pa 8%, i miéntrastantu ya a paga esaki na tur amtenar, segun Lourens.
Alabes CCvV a logra ku éksito pa introdusí e asina yamá “bashi-premie” ku Gobièrnu a aprobá i paga entretantu.
CCvV ta enfatisá ku nan ta sigui traha pa trese miho kondishonnan laboral pa e amtenarnan. Un koöperashon konstruktivo ku gobièrnu ta esensial pa esaki. Sinembargo den prátika, esaki por bira difísil ora ku frekuentemente reunionnan di CGOA (Centraal Georganiseerd Overleg Ambtenarenzaken) i su grupo(nan) di trabou keda kanselá. Esaki por kousa stagnashon, pero, segun Lourens, esaki no ta stroba CCvV di sigui traha.
Pa e aña aki, CCvV a proyektá prioridatnan ambisioso. Entre otro, lo sigui traha duru riba introdukshon di un struktura salarial nobo, pago di e “bashi-premie” riba un base struktural i realisashon di un siman di trabou di 36 ora, ku mantenshon di un pago basá riba 40 ora.
Ku tur e esfuerso aki, CCvV ta kontinua ku e lucha pa yega na kondishonnan laboral duradero i hustu pa tur amtenar di Kòrsou.
