Durante un enkuentro ekstraordinario di ‘Centraal Georganiseerd Overleg in Ambtenarenzaken’ (CGOA) tené na Base di Marina Parera, Gobièrnu i sindikatonan di trahadónan di Gobièrnu a firma un akuerdo, riba Djaluna 7 di febrüari ultimo; esaki tabata pa formalisá e deskripshon i evaluashon di funshonnan di e ámtenarnan ku ta laborá na e basenan di Wardakosta na Kòrsou. Ku esaki e formashon di personal di Wardakosta empleá na Kòrsou a keda formalisá. Na e okashon aki tambe tabatin presente algun invitado.
Na nòmber di Gobièrnu e akuerdo a keda firmá pa Minister Ornelio (‘Kid’) Martina di (Bestuur, Planning en Dienstverlening (BPD)’ Direktorado Planifikashon i Servisio i e Sindikatonan di Gobièrnu STrAF, ABVO, NAPB, SAP i SITEK, kual ta uní den e Komishon Sentral di Sindikatonan (Centrale Commissie van Vakbonden (CCvV).
Tantu Minister Martina komo señor Abrahams, ku a keda apuntá komo orador di CCvV pa e akontesimentu speshal aki, a enfatisá e importansha di formalisashon di e posishon hurídiko di personal di Wardakosta. Presidente di CGOA Richard Begina, a felisitá e partidonan ku e paso importante aki i Direktor di Wardakosta Frank Boots, a vosiferá su apresio pa e hecho ku partidonan, despues di a negoshá pa años a logra akordá i firma e kombenio.
![Convenant - Kustwacht](https://cgoa.kukiko.tempurl.host/wp-content/uploads/sites/340/2022/02/Convenant-Kustwacht.jpg)