Na 1992 Nashonnan Uní a proklamá e promé djasabra di yüli di kada aña komo Dia Internashonal di Kooperativa. Djasabra 6 di yüli 2019 MEO a selebrá e Dia Internashonal di Kooperativa ku un seminario. E tema di e aña aki “Kooperativanan pa Trabou Digno” a keda skohé pa Nashonnan Uní i International Cooperative Alliance teniendo na kuenta e desigualdat kresiente, e oumentu di insiguridat di trabou i e nivel haltu di desempleo, partikularmente bou di hubentut. E tema a keda skohé pa asina duna sosten na e Sustainable Development Goal number 8 (SDG); “Desaroyo Inklusivo i Trabou Digno“.
Kooperativanan ta sentrá rondó di e hende i nan tin un ròl importante pa hunga den kreashon i mantenshon di trabounan digno den kada komunidat, di e forma aki ta empoderá e hende tantu riba aria sosial i ekonómiko.
Djasabra 6 di yüli Minister di Desaroyo Ekonómiko Kenneth Gijsbertha a hasi apertura di e seminario, ku a konosé tres orador lokal i un orador internashonal.
Komo oradornan lokal tabata tin sra. Peggy Isenia, presidente di FEKOSKAN, ku a papia riba “E importansia di kooperativa pa ku Trabou Digno”, sr. Raúl Henriquez, direktor di Konseho Sosial Ekonómiko (SER) ku a papia riba “Desaroyonan Laboral Mundial/ Future of Work” i sr. Edward St. Jacobs, presidente di Sentral Sindikal di Kòrsou, ku a papia di “E punto di bista sindikal i di “International Labour Organization” (ILO) pa ku Trabou Digno” .
Komo orador prinsipal internashonal a papia sr. Andrés Alvarez Ovares, Director de proyectos del Centro de Estudios y Capacitación Cooperativa (CENECOOP), ku a elaborá riba “Kon Kooperativa por prepará su mes pa benefisiá di Future of Work i logra Trabou Digno”.
Na final di e presentashonnan a tene un pènel kaminda tantu e oradornan i públiko presente por a interkambiá ku otro riba e mensahe ku e kuater oradornan a presentá durante di e seminario.
Riba e foto por mira d.r.p.d. Kenneth Valpoort (Union), Minister Hensley Koeiman (Labor), Andrés Alvarez Ovares, Minister Kenneth Gijsbertha, Peggy Isenia, Raúl Henriquez.
Pronto e video i foto di e selebrashon lo ta disponibel riba e facebook page di MEO