Representashon sindikal di empleadonan públiko i gobièrnu ta sera akuerdo riba lista di prioridat ku mester ser atendé durante próksimo seis lunanan

Willemstad, 30 di òktober 2019 – Durante un enkuentro informal ku a tuma lugá djamars dia 29 di òktober último na Acoya Curaçao Resort, Villas and Spa, partidonan den CGOA (Centraal Georganiseerd Overleg in Ambtenarenzaken), esta gobièrnu i e sinku organisashonnan representativo (ABVO, STrAF, NAPB, SAP i Sitek) ku ta forma parti di Komishon Sentral di Sindikatonan (Centrale Commissie van Vakbonden, CCvV) a haña otro riba un lista di prioridat ku lo mester wòrdu atendé den e periodo novèmber 2019 te ku aprel 2020 pa asina yega na mas efisiensia i efikasia den funshonamentu di aparato públiko i ku mester kondusí na redukshon di gastunan di personal.

E lista di prioridat aki mester ser formalisá ainda den un reunion ordinario di CGOA i ta akapará básikamente puntonan ku tin di haber ku posishon hurídiko di ámtenarnan i e maneho di personal. Promé ku gobièrnu por aprobá e puntonan aki i ehekutá nan, mester hiba un diálogo sosial bipartit den seno di CGOA ku representantenan sindikal di empleadonan públiko. E lei di CGOA ta stipulá esaki i ta stipulá tambe ku partidonan den CGOA mester yega na un akuerdo ku otro. E akuerdonan aki ta ser ankrá den konvenionan firmá pa partidonan i pa presidente di CGOA.

Meta di e enkuentro informal na Acoya tabata entre otro pa partidonan duna nan punto di bista riba e maneho di personal di gabinete i pa konhuntamente determiná un lista di prioridat ku realístikamente lo mester wòrdu atendé den un lapso di seis luna, teniendo na kuenta e rekursonan humano disponibel i e kapasidat institushonal di gobièrnu.

Na inisio di e enkuentro Promé Minister sr. Eugènne Rhuggenaath a duna un splikashon amplio di e strategia i e akuerdo di kresementu, ku su gabinete a firma ku gobièrnu Hulandes, den kua tin diferente medidanan proponé pa redusí gastunan di personal i fortalesé kapasidat di goberná  pais. Despues Minister di Maneho, Planifikashon i Servisio Públiko (BPD) sr. Armin Konket a elaborá entre otro riba dos trayekto, di kua e promé unu ta e trayekto di ‘quick wins’ i e di dos ta e trayekto struktural pa yega na reformanan institushonal den e aparato.

Komishon Sentral di Sindikatonan CCvV tambe a menshoná situashonnan den entre otro e ministerio di hustisia i e ministerio di enseñansa ku mester di atenshon. Den e kuadro aki e sindikatonan a urgi gobièrnu pa struktura e diálogo den e dos ministerionan aki na un manera mas efektivo. Tambe sindikatonan a mustra riba palabrashonnan ku ahinda mester wòrdu ehekutá.

Sekretario general di CGOA sr. Raul Henriquez i Direktor di Departamento di Rekurso Humano di gobièrnu (HRO) sra. Luz Celeste Johannes a presentá na partidonan un forma nobo i mas efikas di traha den seno di CGOA pa asina por alkansá e prioridatnan durante e periodo kumbiní. Konforme e forma nobo di traha aki tur trabou preparatorio lo tuma lugá den gruponan di trabou i den komishonnan den kua tin representashon di ámtenarnan ku e ekspertisio nesesario riba tereno hurídiko, finansiero i di personal i tambe personanan ku ekspertisio nesesario ku mandato di CCvV. E gruponan di trabou i/o e komishonnan lo ser presidí pa e presidente o presidente suplente di CGOA.

Pa mas informashon por bishitá e sitio riba ret digital: www.cgoacuracao.cw