Presentashon partisipashon dor di CAOP den koperashon ku CGOA
Willemstad, 6 desèmber 2019 – Djaweps dia 5 di desèmber 2019, ’Centrum Arbeidsverhoudingen Overheidspersoneel’ (CAOP) den koperashon ku ’Centraal Georganiseerd Overleg in Ambtenarenzaken’ (CGOA) a hasi un presentashon tokante di partisipashon di trahadó. E seshon dinámiko i interaktivo aki a wòrdu presentá dor di Marco Sikkel i Alphons de Lange. Tur dos ta empleá na CAOP i tin hopi aña envolví den e desaroyo di partisipashon di trahadó entre otro aki na Kòrsou.
E presentashon aki ta e promé di un seri di enkuentronan plania tokante e tema “trabou signifikativo”. Trabou ta haña entre otro mas nifikashon si trahadónan por tin influensia riba nan esfera di trabou, e fasilidatnan na trabou i e tomo di desishon di e organisashon kaminda nan ta laborá. CAOP ta konektá sensia ku maneho i práktika i tin komo meta duna un aporte na komunidat kaminda hende por hasi un trabou signifikativo.
E seshon a wòrdu asistí dor di representantenan di e sindikatonan ku ta representá trahadónan den sektor públiko, miembronan di e Konseho Sosial Ekonómiko (SER), ámtenarnan di diferente ministerio i otro interesadonan.
Partisipashon ta trata e manera kon por envolví trahadónan den e tomo di desishon den nan organisashon. Durante di e presentashon CAOP a duna atenshon na e diferente formanan di partisipashon, ku ta esun direkto, indirekto i esun eksterno.
Mirando e grupo di enfoke, ku ta gobièrnu, CAOP kier a sondia si tin nesesidat pa tin prinsipalmente e partisipashon indirekto. Esaki tambe lo por ta e promé stap pa yega na trabou signifikativo. Den enkuentronan benidero lo amplia mas riba e tópiko aki.
E presidente di CGOA, prof. dr. ing. Valdemar Marcha a sera e enkuentro aki bisando ku e presentashon tabata hopi informativo kaminda tabata tin un diálogo ku por wòrdu mira komo un promé stap den direkshon di partisipashon real i efektivo.
Pa e Presentashon i Spich klek aki
Riba e potrèt: CAOP i partisipantenan