Minister Konket: ‘Redukshon di gastu notabel den 2022’
Ta spera ku e hubilashon antisipá boluntario (vrijwillige vervroegde uittreding, VVU), riba kua ya kasi tin un akuerdo entre gobièrnu i representashon sindikal di empleadonan públiko, lo kondusí na aña 2022 i no mas promé na un redukshon di gastunan di personal di gobièrnu. Na yanüari 2021 ora e legislashon drenta na vigor, lo tin na promé lugá mas gastu pa gobièrnu paso e hubilarionan lo risibí un suma global for di kua lo dedusí impuesto i kontribushonnan na seguridat sosial. Ademas, lo kubri gastunan di prima di penshun pa e grupo aki te ku nan 65 aña i lo kompensá seguro general di behes, seguro di viuda i wèrfano i seguro di salú básiko.
Sifranan registrá anteriormente a sali for di un redukshon total di gastu di NAfl. 45 mion durante di un periodo di 5 aña despues di introdukshon di e areglo di VVU. E kálkulo aki tabata basá riba un plan di terminashon di empleo ku 350 funshonario públiko. Entre tantu e kantidat aki a oumentá te na 630 empleado sigun sifranan publiká resientemente i konfirmá pa Minister Armin Konket di Maneho di Gobernashon, Planifikashon i Servisio Públiko (BPD).
Minister Konket ta konfirmá ademas ku entre tantu a yega na un akuerdo ku e grupo di trabou di CGOA ku a studia i hasi adaptashonnan na e proyekto di lei pa introdukshon di e areglo di VVU i ku lo por firma e konvenio denter di CGOA pronto. Si tur kos kana sigun plan e areglo lo drenta na vigor 1 di yanüari 2021.
E areglo di VVU ta destiná pa ámtenarnan ku a nase entre 1957 i 1960 o ku tin mas ku 30 aña den servisio públiko. Bou di e funshonarionan ku ta deseá di bandoná servisio públiko boluntariamente bou di e areglo di VVU tin un 80 maestro i maestra di skol ku e areglo ta konta pa nan tambe.