Willemstad, 22 di mart 2021 – Despues ku riba rekomendashon konhunto di e dos partidonan den CGOA, esta Minister di Maneho di Gobernashon, Planifikashon i Servisio Públiko i Komishon Sentral di Sindikatonan (CCvV), Gobièrnu a aprobá nombramentu di señor Richard Begina i señor Antonio Hernandez komo presidente respektivamente presidente suplente nobo di e órgano aki, a start un ròndu di konsulta kaminda ámbos persona den nan kalidat nobo a hiba kombersashonnan preliminar ku sekretario di CGOA i tambe ku e dos partidonan. Karakter di e kombersashonnan tabata pa sera konosí mas di aserka ku otro i tambe ku funshonamentu di e órgano. Señores Begina i Hernandez, ku a keda proponé dor di ámbos partido den CGOA, pa e funshonnan ku a bira vakante despues di retiro boluntario di señores Valdemar Marcha i Franklin Hanze, tin konosementu vasto di atministrashon públiko i eksperensia amplio ku funshonamentu di aparato públiko, en partikular riba áreanan ku ta ligá na kondishonnan laboral di empleadonan públiko. Pa luna benidero CGOA lo tene su promé enkuentro plenario bou di guia di e presidio nobo.
