“Centrum Arbeidsverhoudingen Overheidspersoneel (CAOP)” ta deliberá ku Sekretariado SER/CGOA tokante di lei pa normalisá e posishon hurídiko di empleadonan públiko e asina yama “normalisering rechtspositie ambtenaren”
Willemstad, 21 di mei 2019 – E meta mas importante di e lei pa normalisá e posishon hurídiko di empleadonan públiko na Hulanda (WNRA) ta pa realisá un relashon di trabou di dos banda i ekivalente. Esaki ta kuadra mas ku e relashonnan di trabou di awendia i ta forma un base mas sólido pa konfiansa. Tambe ta sali for di e punto di bista ku korte sivil ta esun mas adekuá pa solushoná konfliktonan laboral den sektor públiko. Pa e motibu aki porta ta bale la pena pa habri diskushon riba normalisashon di e posishon hurídiko di empleadonan públiko aki na Kòrsou ku partisipashon di tur e stakeholdersnan konserní, prinsipalmente gobièrnu i sindikatonan ku ta representá empleadonan públiko.
E ariba menshoná ta loke sr. Marko Sikkel i sr. Alphons de Lange di CAOP a duna komo sugerensia durante e enkuentro di 17 di mei 2019 ku e direktor/sekretario general i algun konsehero mayó di e Sekretariado di SER i CGOA. Señores Sikkel i de Lange a duna di konosé ku e proseso no ta unu fásil i na Hulanda ya tin algun aña ta kanando. E representantenan di CAOP e dianan aki ta riba nos islanan pa deliberá ku organisashonnan gubernamental den e sektor di hustisia, manera Warda Kosta, tokante temanan manera partisipashon i e influensia ku e sindikatonan por tin riba esaki.
Den luna di mei aña pasa tambe señores Sikkel i de Lange tabata tin un enkuentro ku algun konsehero di Sekretariado de SER i CGOA. E dia ei nan a para ketu na e nesesidat di duna kontenido na artíkulo 22, insiso dos, di e Areglo di Estado di Kòrsou. Segun e artíkulo ei por, pa medio di un ordenansa nashonal, pone regla tokante e posishon di esunnan ku ta ehersé un funshon/hasi un trabou i nan protekshon i tambe partisipashon. Na promé lugá a deliberá tokante e tópiko di partisipashon. “pa ku e tópiko di partisipashon lo ta bon si den e aña aki e haña forma konkreto den por ehèmpel servisionan di gobièrnu di Kòrsou. Na mi pareser e sindikatonan ta para habri” asina señor Sikkel a trese pa dilanti.
Durante e interkambio di e aña aki ku Sekretariado di SER/ CGOA diferente problemátika a wòrdu atendé, manera “ki problema WNRA ta solushoná”, kiko e empleado públiko lo ripará di WNRA, dikon e lei di empleado públiko 2017 a wòrdu introdusí, kiko WNRA ta nifiká pa e sindikatonan i pa e konseho di empresa. E tópiko di normalisashon di e posishon hurídiko di e empleado públiko ta hopi aktual i interesante pero tambe hopi kompleho. Konsekuentemente, investigashon profundo ta nesesario. E realisashon i deseo di esaki mester wòrdu atendé di un manera responsabel den konteksto di nos pais, segun direktor/sekretario general sr. Raul Henriquez.
Na final di e enkuentro sr. Henriquez a mustra su apresio pa e trabou ku CAOP ta ehersiendo na Kòrsou i a duna di konosé ku sigur e lo tuma na kuenta e invitashon di e direktor de CAOP sr. Philip Geelkerken pa un enkuentro personal pa asina por interkambiá di idea tokante e tema aktual ‘Trabou ku Kontenido’ (Betekenisvol Werk).
Riba e potrèt di robes pa drechi: mw. Miloushka Sboui-Racamy (sr. adviseur/jurist), dhr. Raul Henriquez (directeur/algemeen secretaris), dhr. Marko Sikkel (CAOP), mw. Sharlyn Villarreal-Curial (sr. adviseur/jurist), dhr. Alphons de Lange (CAOP), mw. Sonja Boersma (sr. adviseur/econoom) en mw. Barbara Perquin (sr. adviseur/niet-westers socioloog).
Klek aki pa e presentashon